Кĕр-кĕрлерĕ Шупашкар районĕ
Ĕçре палăрнисене чысларĕç
Тутаркасси ял тăрăхĕнче пурăнакансем уява тĕплĕн хатĕрленни куç кĕретех: нумай хваттерлĕ çуртсен фасадне сăрăпа сăрланă, чечексем, клумбăсем лартнă, ача-пăча валли площадкăсем вырнаçтарнă, çулсене, тротуарсене юсанă. Уява курма Çĕнĕ Тутаркассине халăх лăк тулли пухăнчĕ, кунта ватти те, вĕтти те пулчĕ. Мероприяти «Обряды наших предков», «Цветущий сад» театрализациленĕ представленипе, районти пултарулăх коллективĕсем чăвашсен авалхи йăли-йĕркине кăтартса панипе уçăлчĕ.
Малалла уявăн официаллă пайĕ пуçланчĕ, унта Шупашкар районĕнчи производствăра çитĕнÿсем кăтартакансене чысларĕç. Чи малтан Шупашкар район пуçлăхĕ А.М. Исаева сăмах илчĕ: «Мĕн авалтан пирĕн асаттесемпе асаннесем çур аки ĕçне вĕçлесен пысăк уяв, Акатуй ирттернĕ. Унта вĕсем пĕр-пĕрне ака-суха пĕтнĕ, çу кунĕсем çитнĕ ятпа саламланă, çавăн пекех юрăсем шăрантарнă, ташланă, пĕр-пĕринпе калаçса киленнĕ. Паян та Акатуй чăвашсемшĕн чи пысăк наци уявĕ шутланать. Мĕншĕн тесен вăл ĕлĕкхи пурнăçа паянхи кунпа тата малашлăхпа çыхăнтарса тăрать». Çавăн пекех Акатуй чăвашлăха, чăваш чĕлхине, унăн культурине, йăла-йĕркине сыхласа хăварма май панине палăртрĕ вăл. «Ял хуçалăх ĕçченĕсен кăтартăвĕсем çĕре питĕ юратнипе, ун çинчи йывăр ĕçе тăрăшса тунипе пулнă. Ака-сухаран уйрăлас марччĕ!» – терĕ Алевтина Михайловна. Шупашкар район администраци пуçлăхĕ Г.И. Егоров та ăшă сăмахсем каларĕ. Сĕтел çинчен çăкăр татăлманнинче çĕр ĕçченĕн тата выльăх çитĕнтерекенĕн тÿпи пысăк пулнине палăртрĕ вăл. Çурхи ĕçсене мĕнле аван пуçланă, малалла та çапла туса пыма сунчĕ. А.М. Исаева тата Г.И. Егоров çур аки пĕтĕмлетĕвĕсене турĕç, ĕçре палăрнисене Шупашкар район администрациĕн Хисеп грамотисемпе тата тав хучĕсемпе чысларĕç.
ЧР Пуçлăхĕн Администрацийĕн ертÿçи А.С. Иванов ял хуçалăхра чи ĕçченнисене патшалăх тата ведомство наградисем пачĕ. Пурне те уявпа саламланă май района малалла та ăнăçу сунчĕ: «Ĕçе аван туса пыракан пур пулсан наградăсем хăйсен хуçисене тупаççĕ».
ЧР Патшалăх Канашĕн Председателĕн çумĕ А.П. Князев çурхи ĕçсем валли 100 млн тенке яхăн уйăрни пирки каларĕ. Халĕ тухăç туса илесси çанталăкран тата тыр-пула епле пăхса ÿстернинчен килнине палăртрĕ вăл. «Вăхăтра çумăр çутăр, тыр-пула та кая юлмасăр пуçтарса кĕресчĕ», – терĕ Чăваш Республикинчи ачасен прависене хÿтĕлекен уполномоченнăй В.В. Рафинов. Акатуйра ĕçре маттуррисене, çур акинче палăрнисене чысланисĕр пуçне ача садĕнче хушма ушкăн уçма 2 млн та 420 тенкĕ уйăрни пирки калакан Сертификата Тутаркассинчи «Золушка» ача сачĕн заведующине тыттарчĕç. И.Ф. Филиппова «Шупашкар районĕн хисеплĕ гражданинĕ» ятне пачĕç. «Мĕн калас, эпĕ нимĕнле тĕлĕнмелли ĕç те туман. 1953 çултан пуçласа 2003 çулччен çул-йĕр мастерĕ пулса тăрăшнă», – тав турĕ вăл награда илнĕ май.
Покрышкăран – акăш
Акатуйра хăнасене Шупашкар районĕнчи пултарулăх коллективĕсем савăнтарчĕç. «Солнечное детство» ача площадкинче аттракционсем ĕçлерĕç, ачасем валли викторинăсем иртрĕç. Сывă пурнăçа кăмăллакансем вара спорт площадкинче пĕр-пĕринпе алă вăйĕ виçессинче, михĕпе «кĕрешессинче», ирĕклĕ кĕрешÿре, волейболра, мини-футболра, дартсра, юпа çине улăхассинче ăмăртрĕç. Спортпа массăллă мероприятисенче 392 çын хутшăнчĕ.
Уяв площадкинче палаткăсенчен йĕркеленĕ «Ял картишĕ» хула, «Ăстасен ылтăн аллисем» курав-ярмăркка, вĕсенче маçтăрсем чечек çыххисем хатĕрлессипе, чăвашсен авалхи йăли-йĕркине сăнлакан кăшăл, çуллахи панамка çыхассипе мастер-классем ирттерчĕç... «Ял картишне» районти пур 17 ял тăрăхĕ те хутшăнчĕ. Вĕсем хăйсен кил картисене Тăван тавралăха хÿтĕлемелли çулталăка халалланă. Акă Чăрăшкасси ял тăрăхĕн картишĕнче кăмака та, апат-çимĕçпе пуян сĕтел, ял пурнăçне сăнлакан стендсем те вырнаçтарнă. Çĕньял ял тăрăх картишĕ вара чĕрĕ чечексенчен хатĕрленĕ композицисемпе палăрать, «сунăм чечекĕ» салтак тÿми те пур. Сарапакассисем вара хăнасене сăрапа, тулли сĕтелпе кĕтсе илчĕç. Çырмапуç ял тăрăх картишĕ те хăйĕн илемĕпе тыткăнларĕ. Пĕве хĕрринче саппун çыхнă, çăпата сырнă «кинемей» шур акăш çине «пăхса ларать». Акăшсене кивĕ покрышкăран касса ăсталанă. Çĕньял-Покровски ял тăрăх кил картинчи кулленхи пурнăçра усă курмалли йывăç витрепе курка, уйран çÿпçи, çăмран йăваланă калушсемпе тапăчкисем пур. Кÿкеçсем вара хăйсен картишне Раççей Федерацийĕн тава тивĕçлĕ художникĕн М. Симаковăн чăваш халăх тĕриллĕ япаласемпе илемлетнĕ. Ишексен картишĕнчи чечекленекен пахчана вара икĕ шур акăш «хураллать». Вĕсене те кивĕ покрышкăсенчен хатĕрленĕ. Бассейнра «пингвинпа сысна» çури ишеççĕ. Ишлей ял тăрăхĕн картишĕнче «Сад моей мечты», «Живо село – жива Чувашия» стендсем йĕркеленĕ. Бисерпа усă курса çыхнă ĕçсене вара тытса пăхмасăр чун чăтмасть. Вăрман-Çĕктер ял тăрăхĕн картишне пластмас савăтсенчен туса хатĕрленĕ. Покрышкăран тунă шур акăш та пур кунта. «Эпир çут çанталăка упратпăр, пĕр чĕрĕ япала та усă курман», – теççĕ вăрманçĕктерсем. Атайкассисем картише чечексемпе тата тĕрĕллĕ ĕçсемпе илемлетнĕ. Тутаркасси ял тăрăх картишĕнчи апат-çимĕçпе пуян сĕтел, кашни ял пурнăçне сăнласа паракан стенд кăна мар, хулăран çыхнă сĕтел-пукан, карçинкка, урайне сармалли тĕртнĕ пир кавир та куçа илĕртеççĕ. Шемшерсем тухья-хушпу тенкисемпе тĕлĕнтерчĕç, вĕсем патĕнче те Акатуй иртессине шаннине палăртрĕç. Апаш ял тăрăх картишĕнче йывăçран тунă çăл умĕнче катка, хĕвел çаврăнăшсем вырнаçтарнă. Янăш ял тăрăхĕн кил картинчи урайне хурăн пĕренисенчен каснă çаврашкасемпе илемлетни, пысăк тухья çине Янăш тесе çырни асра юлчĕ. Стенасем çинче тĕрленĕ эрешсемпе картинăсем вырнаçтарнă. Кăшавăш ял тăрăхĕн кил картине кĕрсенех çĕр чăмăрĕ курăнса ларать, ун çийĕн «шур акăшсем» вĕçсе иртеççĕ, çакă çĕр çинче яланах мирлĕ пурнăç пултăр тенине пĕлтерет. Уявра чăваш наци блюдисене те ас тивсе пăхма май пулчĕ.