Çепĕç юрă тыткăнларĕ чуна
Концерт программи интереслĕ театрализаци композицийĕпе уçăлчĕ. Ун хыççăн нумаях пулмасть йĕркеленнĕ фольклор коллективĕ (художество ертÿçи А.Петрова) «Улах сăрин» уявне туллин кăтартса пачĕ.
Яланхи пекех, пултаруллă солистсем – В.Павлов, А.Верьялов, Т.Давыдовапа Е.Муромцева залри халăха чуна тыткăнлакан юрăсемпе савăнтарчĕç. Ача-пăча искусство шкулĕн преподавателĕсен «Каприс» ансамблĕн, хĕрарăмсен тата арçынсен вокал ушкăнĕсен (аккомпаниаторĕ В.Харитонов) илемлĕ юррисене те куракансем ăшшăн йышăнчĕç. С.Никишина вара аккордеонпа çепĕç кĕвĕ çеммине профессилле ăсталăхпа каласа кăтартрĕ. «Антонина» халăх ташă ансамблĕ (руководителĕ А.Нефедова) чăваш халăх тата хальхи çамрăксен эстрада ташшисене питĕ килĕшÿллĕн ташлани чун-чĕрене ăшă туйăмсемпе пуянлатрĕ. Халăх театрĕн (режиссерĕ В.Львова) актерĕсем хальхи пурнăçа сăнлакан мыскарасене ĕнентерÿллĕн те чылайлăха асра юлмалла выляса пачĕç.
Сценăн декораци тĕлĕшĕнчи илемлĕхĕ те залри халăха тыткăнларĕ. Н.Угарин пултаруллă драматург кăна мар, ăста художник-оформитель пулни те яр-уççăн курăнчĕ.
Пуян программăллă концерт хыççăн тулли зал чылайччен алă çупрĕ. Республикăри жюри членĕсем шăмăршăсен творчество ăсталăхĕ çÿллĕ шайра пулнине палăртрĕç. Вĕсем Культура керменĕн ытти ĕç-хĕлне те (учрежденин шалти тата тулашĕнчи илемлĕхĕ, инноваци технологийĕсемпе еплерех усă курни, халăха творчество коллективĕсене явăçтарасси мĕнлерех пыни тата ытти те) лайăхпа хакларĕç.
Республикăри конкурса Пуянкассинчи культура çурчĕ те хутшăнать (заведующийĕ Л.Михайлова). Жюри членĕсем маларах çак учрежденире те пулчĕç, унăн тĕрлĕ енлĕ ĕç-хĕлне тишкерсе тухрĕç, ялти пултарулăх коллективĕсен концертне курчĕç. Тĕпрен илсен, учреждени ĕçĕпе вĕсем кăмăллă юлчĕç.
Культура учрежденийĕсен республикăри конкурсĕн кăтартăвĕсене декабрь пуçламăшĕнче пĕтĕмлетеççĕ. Районти учрежденисен коллективĕсене конкурсра ăнăçу сунатпăр.